لاہور بورڈ، رزلٹ کارڈز ہارڈ کاپی کا اجراء ختم، طریقہ کار تبدیل

بورڈ آف انٹرمیڈیٹ اینڈ سیکنڈری ایجوکیشن لاہور نے انٹرمیڈیٹ کے رزلٹ کارڈز جاری کرنے کے طریقہ کار میں تبدیلی کرتے ہوئے ہارڈ کاپی جاری کرنے کا سلسلہ ختم کر دیا ہے۔ بورڈ حکام کے مطابق اب انٹرمیڈیٹ کے رزلٹ کارڈز پرنٹ شدہ شکل میں فراہم کرنے کے بجائے سافٹ فارم میں جاری کیے جائیں گے۔ لاہور تعلیمی بورڈ نے اس حوالے سے تمام متعلقہ تعلیمی اداروں کو نئے طریقہ کار سے آگاہ کر دیا ہے۔حکام کا کہنا ہے کہ رزلٹ کارڈ پر موجود کیو آر کوڈ کے ذریعے نتائج کی آن لائن تصدیق بھی کی جا سکے گی۔ بورڈ کے مطابق پرائیویٹ امیدوار اپنی رزلٹ کارڈ کی سافٹ کاپی بورڈ کی ویب سائٹ سے ڈاؤن لوڈ کر سکیں گے، جبکہ ریگولر امیدواروں کے رزلٹ کارڈ متعلقہ تعلیمی اداروں کے پورٹل پر بھجوا دیے گئے ہیں۔ لاہور بورڈ حکام کے مطابق رزلٹ کارڈز کی پرنٹنگ اور ان کی ترسیل کا عمل ختم ہونے سے بورڈ کو کروڑوں روپے کی بچت ہوگی۔ بورڈ حکام کا کہنا ہے کہ نئے طریقہ کار کا مقصد رزلٹ کارڈز کے اجرا کے عمل کو ڈیجیٹل بنانا اور اس سے متعلق اخراجات میں کمی لانا ہے۔ یاد رہے کہ لاہور بورڈ نے بدھ کو انٹرمیڈیٹ امتحانات کے نتائج جاری کیے تھے، جن میں مجموعی کامیابی کا تناسب 64.98 فیصد رہا۔ امتحان میں ایک لاکھ 89 ہزار 373 امیدواروں نے حصہ لیا جن میں سے ریگولر امیدواروں کی کامیابی کا تناسب 71.67 فیصد جبکہ پرائیویٹ امیدواروں کی کامیابی کا تناسب 44.83 فیصد رہا۔ مزید پڑھیں:وزیراعظم کا محمود خان اچکزئی کو ایک اور خط، مذاکرات کی دعوت اس کے علاوہ طالبات کی کامیابی کا تناسب 73.74 فیصد اور طلبہ کی کامیابی کا تناسب 51.54 فیصد رہا۔ امیدوار نتائج کی ری چیکنگ کیلئے آن لائن درخواست دے سکتے ہیں۔