रियाद विमानस्थललाई लक्षित गरी दोस्रो पटक आक्रमण, १ जनाको मृत्यु, ११ घाइते

रियाद । साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा दोस्रो पटक भएको क्षेप्यास्त्र प्रहारमा परी एक जनाको मृत्यु भएको छ भने ११ जना घाइते भएका छन्। साउदी सैन्य प्रवक्ताका अनुसार आइतबार विमानस्थलमा एक क्षेप्यास्त्र खसेको थियो, जसका कारण यात्रु हल नम्बर ४ मा भीषण आगलागी भएको थियो। साउदी नागरिक उड्डयन प्राधिकरणले सामाजिक सञ्जाल एक्समा वक्तव्य जारी गर्दै उक्त आक्रमणमा परी एक पाकिस्तानी नागरिकको मृत्यु भएको पुष्टि गरेको छ। यसअघि शनिबार सोही विमानस्थलमा भएको अर्को आक्रमणमा १३ जनाको मृत्यु हुनुका साथै ३०८ जना घाइते भएका थिए। यमनका हुथी विद्रोहीले यी आक्रमणको जिम्मेवारी लिँदै एयरलाइन्स र यात्रुहरूलाई साउदी अरबका विमानस्थल तथा हवाई मार्ग प्रयोग नगर्न चेतावनी दिएका छन्। विगत २४ घण्टामा ब्यालिस्टिक तथा क्रुज क्षेप्यास्त्र र ड्रोन प्रयोग गरी विमानस्थललाई लक्षित गरिएको हुथी समूहले दाबी गरेको छ। हुथी सैन्य प्रवक्ता ब्रिगेडियर जनरल याह्या सारेका अनुसार उनीहरूले पूर्वी साउदी अरबका तेल प्रशोधन केन्द्र र दम्माम विमानस्थलमा पनि आक्रमण गरेका छन्। साउदी अरबभित्र आक्रमणलाई अझ तीव्र पार्ने चेतावनी दिँदै उनले मक्का र मदिनाका पवित्र सहर बाहेक सबै साउदी विमानस्थल सम्भावित निशानामा रहेको बताएका छन्। यमनको गृहयुद्धमा सरकारी सेनालाई साउदीले गरेको समर्थन र साना विमानस्थलमा भएको हवाई हमलाको जवाफमा साउदी अरबलाई लक्षित गरिएको हुथीहरूले जनाएका छन्। आइतबार साउदी नेतृत्वको सैन्य गठबन्धनका प्रवक्ता मेजर जनरल तुर्की अल-मालिकीले रियाद विमानस्थल नजिकै एयर डिफेन्स प्रणालीले एउटा क्षेप्यास्त्र निष्क्रिय पारेको बताएका छन्। यात्रु हलमा अज्ञात क्षेप्यास्त्र खसेर लागेको आगो नियन्त्रणमा लिन अधिकारीहरू खटिएका थिए। अमेरिकी राष्ट्रपति डोनाल्ड ट्रम्पले हुथीहरूविरुद्ध आक्रमण गर्ने वा नगर्ने विषयमा अमेरिकाले छिट्टै निर्णय लिने बताएका छन्। बेलायती रक्षा मन्त्री वेस स्ट्रिटिङले बेलायतले साउदी अरबलाई थप सहयोग उपलब्ध गराउन सक्ने सङ्केत गरेका छन्। गत फेब्रुअरीमा इजरायल, अमेरिका र इरानबिच युद्ध सुरु भएयता शनिबारको आक्रमण गल्फ क्षेत्रका अरब देशमा भएको सबैभन्दा घातक मानिएको छ। साउदी नेतृत्वको गठबन्धनले यसलाई युद्ध अपराध भन्दै कडा जवाफ दिने प्रतिबद्धता जनाएको छ। शनिबारको आक्रमणमा परी चार साउदी नागरिक, दुई बङ्गलादेशी तथा अमेरिका, जोर्डन, प्यालेस्टाइन, सिरिया, सुडान र इजिप्टका एक-एक जनाको मृत्यु भएको साउदी नागरिक उड्डयन प्राधिकरणले जनाएको छ। साउदी स्थित भारतीय दूतावासका अनुसार आक्रमणमा घाइते भएका एक भारतीय नागरिकको पनि उपचारका क्रममा मृत्यु भएको छ। अमेरिकी विदेश मन्त्री मार्को रुबियोले आक्रमणको भर्त्सना गर्दै एक अमेरिकी नागरिकको मृत्यु भएको पुष्टि गरेका छन्। बेलायती विदेश मन्त्रीेड मिलिब्यान्डले पनि घटनाप्रति दुःख व्यक्त गरेका छन्। बेलायती विदेश मन्त्रालयले आफ्ना नागरिकलाई यमन सीमाबाट १० किलोमिटरसम्मका साउदी भू-भाग र जोखिमयुक्त क्षेत्रमा यात्रा नगर्न आग्रह गरेको छ। अन्य पश्चिमी दूतावासहरूले पनि आफ्ना नागरिकलाई सचेत गराएका छन्। यसैबिच हुथीद्वारा सञ्चालित अल मसिराह टिभीले साउदी सेनाले यमनको राजधानी सानास्थित अन्तर्राष्ट्रिय विमानस्थलमा हवाई हमला गरेको जनाएको छ। सहरको एक आवासीय घरमा पनि बम खस्दा एक बालकको मृत्यु भएको र ६ जना घाइते भएको दाबी गरिएको छ। यद्यपि साउदी अरबले यो आक्रमणको पुष्टि गरेको छैन र यसको स्वतन्त्र पुष्टि हुन बाँकी छ। यमनको अन्तर्राष्ट्रिय मान्यता प्राप्त सरकारका उपराष्ट्रपति अब्दुल्लाह अल-अलिमी बावजिरले क्षेत्रीय र अन्तर्राष्ट्रिय साझेदारहरूसँग निर्णायक कदम चाल्न आह्वान गरेका छन्। यसअघि बिहीबार पनि रियाद विमानस्थलमा क्रुज क्षेप्यास्त्र प्रहार हुँदा तीन साउदी नागरिकको मृत्यु भएको थियो। त्यसअघिका दुई दिनमा पनि आभा र रियादका विमानस्थलमा यस्तै आक्रमणहरू भएका थिए।