अमेरिकी सांसद ओकासियो–कोर्टेजद्वारा अमेरिकामा नेपाली समुदायलाई तिहारको शुभकामना

अमेरिकी प्रतिनिधिसभा सदस्य अलेक्जान्ड्रिया ओकासियो–कोर्टेज। तस्बिर: सीएअसेम्ब्लीएडिट्स / विकिमिडिया कमन्स, सीसी बीवाई–एसए ४.०। न्युयोर्क — अमेरिकी प्रतिनिधिसभा सदस्य अलेक्जान्ड्रिया ओकासियो–कोर्टेजले नेपाली समुदायलाई तिहारको शुभकामना दिँदै यस पर्वले सुख, समृद्धि र शान्ति ल्याओस् भन्ने कामना गरेकी छन्। सामाजिक सञ्जाल एक्समा प्रकाशित सन्देशमा उनले रोमन लिपिमा नेपाली भाषामा 'तिहारको हार्दिक शुभकामना' लेख्दै अमेरिकामा रहेका नेपालीहरूलाई सम्बोधन गरेकी छन्। उनले तिहारलाई मानिसको जीवनमा साथ र संरक्षण दिने सम्बन्धहरूको सम्मान गर्न सम्झाउने पर्वका रूपमा उल्लेख गरेकी छन्। 'हामीसँग जीवन बाँड्ने पशुपन्छीदेखि हामीलाई संरक्षण दिने दाजुभाइ तथा दिदीबहिनीसम्म, हामीलाई धान्ने हरेक सम्बन्धको सम्मान गर्न तिहारले सम्झाउँछ,' उनले लेखेकी छन्। 'यसले तपाईंहरूलाई सुख, समृद्धि र शान्ति ल्याओस्।' यसअघि न्युयोर्कका मेयर जोहरान क्वामे ममदानीले नेपाली समुदायलाई तिहारको शुभकामना दिँदै यस पर्वले समृद्धि, शान्ति र अपनत्वको अनुभूति ल्याओस् भन्ने कामना गरेका थिए। सामाजिक सञ्जाल एक्समा प्रकाशित सन्देशमा ममदानीले रोमन लिपिमा नेपाली भाषामा 'तिहारको हार्दिक शुभकामना!' लेखेका थिए। त्यसपछि अंग्रेजीमा लेखिएको सन्देशमा उनले लक्ष्मीपूजामा दियो बाल्ने र भाइटीकामा आपसी सम्बन्धको उत्सव मनाउने हजारौं नेपाली न्युयोर्कवासीलाई सम्बोधन गरेका थिए। 'हजारौं नेपाली न्युयोर्कवासीले लक्ष्मीपूजाका लागि दियो बाल्दै र भाइटीकाको सम्बन्धलाई उत्सवका रूपमा मनाउँदै गर्दा, यस तिहारले तपाईंहरूलाई समृद्धि, शान्ति र तपाईंहरूले पाउनुपर्ने अपनत्वको अनुभूति ल्याओस्,' उनले सन्देशमा भनेका थिए। यो समाचारबारे तपाईंको प्रतिक्रिया प्रतिक्रिया लेख्न वा पढ्न क्लिक गर्नुहोस् ▾