यो वर्षको बडादशैँको टीकाको साइत बिहान १०ः२६ बजे

विराटनगर । यस वर्षको बडादशैँको टीकाको साइत बिहान १०ः२६ बजे निर्धारण गरिएको छ। नेपाल पञ्चाङ्ग निर्णायक विकास समितिले सार्वजनिक गरेको बडादशैँको शुभसाइतअनुसार विजया दशमी तथा देवी विसर्जन कात्तिक ४ गते बुधबार परेको छ। समितिका अनुसार सोही दिन बिहान १०ः२६ बजे टीकाको साइत निर्धारण गरिएको हो। यस वर्षको नवरात्रारम्भ तथा घटस्थापना असोज २५ गते आइतबार बिहान ११ः४७ बजे हुनेछ। फूलपाती असोज ३१ गते शनिबार बिहान ७ः३७ बजे, महाष्टमी कात्तिक १ गते आइतबार बिहान १०ः३९ बजे र महानवमी कात्तिक ३ गते मंगलबार परेको समितिले जनाएको छ। विजया दशमीका दिन टीका लगाउँदा पश्चिम मोहडा गरेर टीका लगाइमाग्नेले पश्चिमतर्फ फर्किनुपर्ने समितिले जनाएको छ।