काठमाडौंसँग चितवन १० रनले पराजित

नेपाल प्रिमियर लिग (एनपीएल) मा काठमाडौं गोर्खाजले चितवन राइनोजलाई १० रनले पराजित गरेको छ । सोमबार त्रिवि क्रिकेट मैदानमा काठमाडौंले दिएको १८१ रनको लक्ष्य पछ्याएको चितवनले निर्धारित २० ओभरमा ७ विकेट गुमाएर १७० रन मात्रै बनाउन सक्यो । चितवनका लागि रवि बोपाराले सर्वाधिक ५५ रन बनाए । उनले ३५ बलमा २ चौका र ३ छक्का प्रहार गरे । कामिल मिश्राले २८, डान माउज्लीले २९ र अर्जुन साउदले २३ रन जोडे । काठमाडौंका लागि सहान आराचिगेले २ तथा सन्तोष यादव, गणेश गौतम, जहान्दाद खान र करण केसीले १–१ विकेट लिए । यसअघि पहिले ब्याटिङ गरेको काठमाडौंले निर्धारित २० ओभरमा ८ विकेट गुमाएर १८० रन बनाएको थियो । उसका लागि राशिद खानले ५२ र सहान आराचिगेले ३३ रन बनाएका थिए ।