نیشنل ہاکی سٹیڈیم لاہور اور اس سے ملحقہ پریکٹس پچ کی مکمل تجدید و اپ گریڈیشن کیلئے فنڈز منظور

لاہور (اُردو پوائنٹ اخبارتازہ ترین - اے پی پی۔ 09 اکتوبر2026ء) پاکستان ہاکی فیڈریشن کی خصوصی درخواست پر حکومتِ پنجاب اور سپورٹس بورڈ پنجاب نے نیشنل ہاکی سٹیڈیم لاہور اور اس سے ملحقہ پریکٹس پچ کی مکمل تجدید اور اپ گریڈیشن کے لیے 40 کروڑ روپے کے فنڈز منظور کر لیے ہیں۔ ترجمان پی ایچ اے کے مطابق منصوبے کے تحت سٹیڈیم اور پریکٹس پچ پر نئی ایسٹرو ٹرف بچھائی جائے گی جبکہ سٹیڈیم کے بنیادی ڈھانچے، کھلاڑیوں کے لیے دستیاب سہولیات اور تربیتی انفراسٹرکچر کی مرمت و تجدید بھی کی جائے گی۔ اس اقدام کا مقصد کھلاڑیوں کو بین الاقوامی معیار کی سہولیات فراہم کرنا اور جدید تقاضوں کے مطابق تربیت کے مواقع بہتر بنانا ہے۔حکام کے مطابق نیشنل ہاکی سٹیڈیم لاہور کی اپ گریڈیشن کا منصوبہ جنوری 2027 تک مکمل ہونے کی توقع ہے۔ اس منصوبے کو قومی کھیل ہاکی کے فروغ، کھلاڑیوں کی صلاحیتوں میں اضافے اور پاکستان میں ہاکی کے روشن مستقبل کو یقینی بنانے کی جانب ایک اہم قدم قرار دیا جا رہا ہے۔