БРИТАНКА КОЈА ОСУМ ПАТИ УЧЕЛА ОДНОВО ДА ОДИ СЕ ПОДГОТВУВА ЗА ХУМАНИТАРЕН МАРШ ЗА БОЛНИЦАТА КАДЕ ШТО СЕ ЛЕКУВАЛА СО ГОДИНИ

Дваесет и четиригодишната Ебони Кларк од Хартклиф во Бристол, која морала осум пати повторно да учи да оди, се подготвува за хуманитарен марш и покрај тоа што живее со состојба која ѝ предизвикува постојани болки. Кларк има хипермобилност, нарушување поради кое зглобовите лесно ѝ се изместуваат, а коските ѝ се исклучително кршливи, па досега поминала низ повеќе операции на колкот. Таа во јануари ќе се обиде да пешачи од јужен Бристол до езерото Чу Вели и оттаму до Кралската детска болница во Бристол, со цел да собере пари за хуманитарната организација 'Гранд апил'. Кларк како пациент поминала голем дел од своето детство во оваа детска болница, лекувајќи се таму уште од најрана возраст па сè додека не наполнила 17 години. Денес таа работи како административен службеник во истиот болнички фонд, Бристол НХС, каде што се лекувала додека растела. По серија хируршки зафати и долготрајна физикална терапија, таа морала да учи да оди по секоја операција, а последен пат тоа се случило во февруари. Кларк вели дека сака да ѝ се оддолжи на болницата која се грижела за неа толку многу години. Нејзиното најрано сеќавање од престојот таму е од нејзината четиригодишна возраст, но додава дека лекарите и персоналот секогаш помагале нејзиното детство да изгледа колку што е можно понормално. Во изјава за 'Би-Би-Си радио Бристол', Кларк ја опиша хипермобилноста како невидлива состојба, споредувајќи ја со настинка што никој однадвор не може да ја види, но таа постојано ја чувствува и ѝ предизвикува непрекината болка. Таа раскажа дека коските ѝ се толку кршливи што еднаш го скршила зглобот на раката само додека кревала предмет од подот. И покрај тоа што дел од лекарите биле загрижени дека ваквиот физички предизвик може да ѝ ја влоши состојбата, таа е одлучна да го изоди маршот и да собере донации. Од болничкиот фонд соопштија дека целосно ја поддржуваат во нејзината одлука.