پاکستان ریلوے نے قراقرم ایکسپریس کے مسافروں کے لیے نعم بدل کا اعلان کر دیا

لاہور (اُردو پوائنٹ اخبارتازہ ترین - آن لائن۔ 25 ستمبر2026ء) پاکستان ریلوے نے لاہور اور فیصل آباد سے کراچی، کوئٹہ اور راولپنڈی کے لیے ٹرینوں کا نیا ایڈجسٹمنٹ شیڈول جاری کر دیا ہے۔ ترجمان ریلوے کے مطابق قراقرم (42-ڈاؤن) کے مسافروں کو آج پاک بزنس ایکسپریس (34-ڈاؤن) اور کراچی ایکسپریس (16-ڈاؤن) میں سفر کی سہولت فراہم کی جائے گی۔ پاک بزنس ایکسپریس اپنے مقررہ وقت سہ پہر 4 30 بجے اور کراچی ایکسپریس شام 6 00 بجے لاہور سے کراچی کے لیے روانہ ہوگی۔ علاوہ ازیں فیصل آباد سے قراقرم ایکسپریس کے مسافروں کو ملت ایکسپریس (18-ڈاؤن) میں اکاموڈیٹ کیا جائے گا، جو سہ پہر 5 50 بجے کراچی کے لیے روانہ ہوگی۔ جبکہ میانوالی ایکسپریس (148-ڈاؤن) براستہ وزیر آباد اور لالہ موسیٰ چلے گی اور دیگر تمام ٹرینیں اپنے معمول کے مطابق رواں دواں رہیں گی۔ ڈی ایس ریلوے انعام اللہ کی ہدایت پر اسٹیشنوں پر مسافروں کی سہولت کے لیے عملہ موجود ہے، جبکہ رہنمائی کے لیے ہیلپ لائن 117 پر رابطے کی ہدایت کی گئی ہے۔