Реал Мадрид преку клупската телевизија повторно ги нападна судиите дека 'навиваат' за Барселона

Клупската телевизија на Реал Мадрид, 'РМТВ', излезе со жестока критика кон судењето во Шпанија, обвинувајќи ги арбитрите за примена на двојни стандарди и за поповолен третман кон Барселона. Најновата реакција на клупската телевизија доаѓа по поразот на Реал Мадрид од Бетис, но главниот фокус не беше резултатот, туку одлуките на судиите во текот на натпреварот. Особено внимание привлече жолтиот картон што му беше покажан на Винисиус јуниор. Во РМТВ овој потег го опишаа како 'капката што ја прелеа чашата', оценувајќи дека станува збор за уште еден пример за, како што тврдат, различните критериуми кои се применуваат кон Реал Мадрид и Барселона. Од клупската телевизија на Кралевите сметаат дека ваквите ситуации не се изолирани случаи, туку дел од поширок проблем во шпанскиот фудбал. Според нив, во одредени ситуации судиите се многу построги кон фудбалерите на Реал Мадрид, додека кон играчите на Барселона покажуваат поголема толеранција. РМТВ дополнително посочи и на наводно блиските односи меѓу дел од судиите и фудбалерите на Барселона, тврдејќи дека таквата блискост може да влијае врз начинот на кој се носат одлуките на теренот. Од Реал Мадрид подолг период се незадоволни од судиските стандарди во Ла Лига, а преку својата клупска телевизија често ги анализираат спорните ситуации и ги критикуваат одлуките за кои сметаат дека се на штета на нивниот тим.