Lista sekrete e Arsenalit me 21 objektiva, në të ishin Vinicius, Alvarez dhe Rogers

BBC ka zbuluar detaje nga planet e Arsenalit gjatë afatit kalimtar të verës, duke publikuar një listë me 21 lojtarë që klubi londinez i kishte monitoruar si objektiva të mundshëm për skuadrën e Mikel Artetës. Në listë figurojnë disa prej emrave më të njohur të futbollit evropian, mes tyre Vinicius Junior, Julian Alvarez, Sandro Tonali, Kenan Yildiz, Joao Pedro dhe Morgan Rogers. Prioriteti i Arsenalit ishte forcimi i sulmit, ndërsa drejtuesit e klubit kishin identifikuar disa alternativa në rast se nuk do të arrinin marrëveshje me objektivin kryesor. Arsenali ishte gati të thyente rekordin britanik për ViniciusinNjë nga transferimet më spektakolare që mund të realizohej ishte ai i Vinicius Juniorit. Sipas BBC-së, Arteta dhe drejtori sportiv Andrea Berta besonin se ekzistonte një mundësi reale për ta transferuar brazilianin nga Real Madridi, në një periudhë kur kishte pasiguri rreth të ardhmes së tij në 'Santiago Bernabéu'. Arsenali ishte i gatshëm të investonte një shumë që do ta kthente Viniciusin në transferimin më të shtrenjtë në historinë e futbollit britanik, ndërsa klubi besonte se ndikimi i tij në fushë dhe vlera komerciale do ta justifikonin një investim të tillë. Megjithatë, në klub ekzistonin dyshime se interesi i Arsenalit mund të përdorej nga Viniciusi në negociatat me Real Madridin. Në fund, braziliani qëndroi në Madrid dhe nënshkroi kontratë të re afatgjatë. Edhe Julian Alvarez ishte në listëNjë tjetër objektiv madhor ishte Julian Alvarez, të cilin Arsenali e kishte ndjekur prej kohësh. Sulmuesi argjentinas nuk shfaqi shumë interes për t'u rikthyer në Angli, ndërsa preferenca e tij ishte Barcelona. Atletico Madridi, megjithatë, nuk ishte i gatshëm ta shiste te klubi katalanas. Arsenali shpresonte se kjo situatë mund ta ndryshonte qëndrimin e Alvarezit, por në fund ai qëndroi në Madrid. Rogers ishte objektivi kryesorPavarësisht emrave të mëdhenj në listë, Morgan Rogers ishte objektivi kryesor i Arsenalit në fillim të afatit kalimtar. Aston Villa fillimisht e vlerësoi anglezin rreth 115 milionë euro, ndërsa Arsenali besonte se vlera e tij ishte afërsisht 92 milionë euro. Villa më pas e rriti çmimin dhe Rogers përfundoi te Chelsea për rreth 135 milionë euro. Arsenali pati mundësinë të barazonte ofertën, por drejtuesit nuk pranuan të paguanin një shumë të tillë. Në listën e alternativave ishin Bradley Barcola, Kenan Yildiz, Yan Diomande dhe Nico Paz, ndërsa klubi londinez monitoronte edhe Joao Pedron. Interesante ishte edhe prania e dy mbrojtësve të Tottenhamit, Cristian Romero dhe Micky van de Ven, të cilët konsideroheshin si opsione në rast se Arsenali nuk do të arrinte marrëveshje për Ezri Konsan. Tottenham nuk dëshironte të diskutonte shitjen e lojtarëve te një prej rivalëve të tij kryesorë. Në fund, Arsenali realizoi disa prej objektivave të merkatos, duke transferuar Bruno Guimaraes, Ezri Konsan, Christos Tzolis dhe Illan Meslier, ndërsa Piero Hincapié u transferua përfundimisht pas huazimit të sezonit të kaluar.