Kristrún um gjaldtöku: 'Við lifum í breyttum heimi'

Kristrún Frostadóttir forsætisráðherra segir tækniframfarir gera stjórnvöldum auðveldara að útfæra gjaldtöku á ferðamannastöðum en þegar hugmyndin um náttúrupassa var til umræðu fyrir rúmlega áratug. Gjaldtakan geti jafnframt nýst til að dreifa ferðamönnum betur um landið. Hún var spurð út í málið á blaðamannafundi ríkisstjórnarinnar í Ráðherrabústaðnum í morgun, þar sem áherslur þingmálaskrár komandi vetrar voru kynntar. Spurningunni var beint að Kristrúnu í ljósi þess að hugmynd um svonefndan náttúrupassa var til umræðu á árunum 2014 og 2015 en þótti þá erfið í framkvæmd og var hætt við hana og í staðinn tekið upp gistináttagjald. Kristrún sagði tæknilega útfærslu hafa reynst erfiða á sínum tíma en að margt hefði breyst síðan. Snjallsímar væru nú útbreiddir og hægt væri að nýta tölvutækni, myndbands- og upptökutækni auk skynjara. 'Við lifum í breyttum heimi þegar kemur að svona hlutum. Við eigum að nýta okkur það.' Eins og mbl.is greindi frá í gær er gert ráð fyrir að ný gjaldtaka í ferðaþjónustu skili ríkissjóði fimm milljörðum króna á næsta ári. Horft er til þess að innheimta gjald af ferðamönnum við náttúruperlur í eigu ríkisins, en ekki er gert ráð fyrir að Íslendingar greiði fyrir aðgang. Fyrirhuguð gjaldtaka hefur sætt gagnrýni frá ferðaþjónustunni. Jóhannes Þór Skúlason, framkvæmdastjóri Samtaka ferðaþjónustunnar, sagði í samtali við mbl.is að boðaðar skattahækkanir á greinina væru 'gríðarleg vonbrigði' og varaði við áhrifum þeirra á samkeppnishæfni Íslands sem áfangastaðar. Kristrún sagði að byrjað yrði á ferðamannastöðum í eigu ríkisins og að ríkið hlyti að geta sett ákveðna stefnu um gjaldtöku á eigin svæðum. Hún sagði fyrirkomulagið einnig geta nýst til að stýra dreifingu ferðamanna. Mikill fjöldi ferðamanna sæki Suður- og Suðvesturland heim og stjórnvöld vilji gjarnan að fleiri ferðist víðar um landið. Þá sagði hún að tæknilausnin sem byggð yrði upp gæti síðar skapað einkaaðilum tækifæri til að taka þátt í fyrirkomulaginu. 'Ég vona að fólk horfi með opnum og jákvæðum augum á þetta,' sagði Kristrún að lokum.