Hræðileg byrjun Tottenham

Tottenham hefur farið afar illa af stað í ensku úrvalsdeild karla í fótbolta og er liðið enn án marks eftir fyrstu þrjár umferðirnar. Tottenham gerði markalaust jafntefli við Nottingham Forest á laugardaginn, en þar á undan hafði liðið tapað 2:0 fyrir Newcastle United og 3:0 fyrir Brentford. Félagið eyddi 334 milljónum punda í nýja leikmenn í sumar en þeir hafa enn sem komið er ekki náð að sýna sínar bestu hliðar. Tottenham hefur ekki skorað í þremur leikjum í röð í fyrsta sinn síðan í nóvember 2021. Enn verra er að liðið átti ekki eitt einasta skot á mark gegn Nottingham Forest. Það er í fyrsta sinn síðan í apríl 2022 sem Tottenham tekst ekki að eiga skot á mark í leik. Tottenham er í 18. sæti deildarinnar, fallsæti, en liðið rétt svo slapp frá falli á síðasta tímabili.