Gucati takon ambasadorin britanik/ Në fokus shqetësimet e veteranëve të UÇK-së

Kryetari i Organizatës së Veteranëve të Luftës së UÇK-së, Hysni Gucati, së bashku me bashkëpunëtorë, ka zhvilluar një takim me ambasadorin e Mbretërisë së Bashkuar në Kosovë, Jonathan Hargreaves. Sipas njoftimit të OVL-UÇK-së, gjatë takimit janë diskutuar çështjet dhe shqetësimet kryesore të veteranëve të UÇK-së, si dhe zhvillimet aktuale që lidhen me ta. Në takim është vlerësuar rëndësia e marrëdhënieve të mira dhe partneritetit ndërmjet Kosovës dhe Mbretërisë së Bashkuar, ndërsa OVL-UÇK ka shprehur mirënjohje për mbështetjen e vazhdueshme britanike ndaj Kosovës. Sipas organizatës, takime të tilla mundësojnë që zëri dhe shqetësimet e veteranëve të përcillen drejtpërdrejt te partnerët ndërkombëtarë të Kosovës.