Зошто сливите треба почесто да бидат на вашето мени

Сливите не се само вкусно и сочно овошје, туку можат да имаат и голем број здравствени придобивки. Тие се богати со антиоксиданси, влакна и други хранливи материи, а истражувањата ги поврзуваат со подобро варење, постабилно ниво на шеќер во крвта и здравје на срцето и коските. Сливите се достапни во цела низа бои, вклучувајќи жолта, зелена, црвена, виолетова и црна. Ова семкасто овошје, наречено така поради големата семка во средината, може да биде слатко, кисело или комбинација од двата вкуса. Постојат повеќе од 200 сорти, и секоја од нив е добра за вас, без оглед на бојата или вкусот. 'Сливите се вкусни, сочни и многу хранливи', вели регистрираниот нутриционист Жулија Зумпано за 'Clevelandclinic'. 'Истражувањата сугерираат дека јадењето сливи може да го намали ризикот од хронични заболувања, вклучувајќи рак, дијабетес, срцеви заболувања и остеопороза.' Зумпано објаснува зошто сливите се толку добри. Дали сливите се здрави? Да, сливите се многу здрави. Свежите сливи, се одличен извор на антиоксиданси. Тие содржат и други корисни хранливи материи. Шест придобивки од сливите Антиоксидансите и хранливите материи во сливите придонесуваат за зачувување на здравјето на различни начини. 1. Тие штитат од рак и воспаление Сливите се богати со фитонутриенти од растително потекло, кои обезбедуваат бројни антиоксидантни придобивки. Ова особено се однесува на темно виолетовите, црвените и сините сливи, кои ја должат својата боја на антоцијанините, еден вид флавоноид или друг антиоксиданс. 'Антиоксидансите се хемикалии кои помагаат да се заштити телото од слободните радикали, кои можат да ги оштетат клетките и ткивата', објаснува Зумпано. 'Антиоксидансите помагаат да се намали воспалението.' Дополнително, преглед на 54 студии покажа дека сливите и производите како што се виното од сливи и екстрактот од сливи можат да го намалат ризикот од одредени видови рак, како што се ракот на дојка или дебело црево. 2. Тие им помагаат на цревата подобро да функционираат Многу луѓе пијат сок од сливи за да ги раздвижат цревата. И свежите и сливите се богати со сорбитол. Овој шеќерен алкохол привлекува вода во дебелото црево, ја омекнува столицата и има лаксативно дејство. Истражувањата покажуваат дека сокот од сливи може да биде безбеден и природен начин за ублажување на запекот. 3. Тие го стабилизираат нивото на шеќер во крвта Една слива содржи околу 7,5 грама јаглехидрати. Природните шеќери, вклучувајќи фруктоза, гликоза и сахароза, сочинуваат 6 грама од овие јаглехидрати. Сепак, сливите не предизвикуваат ненадејни скокови на шеќерот во крвта или нивото на гликоза. 4. Тие го штитат здравјето на срцето Сливите се богати со кверцетин, вид полифенол. Овие соединенија од растително потекло се богати со антиоксиданси кои имаат антиинфламаторни својства. Истражувањата покажуваат дека полифенолите придонесуваат за здравјето на срцето. 5. Тие ја подобруваат меморијата Полифенолите во сливите, исто така, ги опуштаат крвните садови и го подобруваат протокот на крв во мозокот. Истражувањата за полифенолите покажуваат дека оваа хранлива материја може да ја подобри меморијата и функцијата на мозокот. 6. Тие ги зајакнуваат коските Хранливите материи во сливите, како што се витамин Ц, витамин К и калиум, придонесуваат за зајакнување на коските. Студија во која учествувале жени во постменопауза кои јаделе сливи секојдневно покажала помала стапка на губење на коскената маса и подобро целокупно здравје на коските. 'Сливите можат да го намалат ризикот од остеопороза', додава Зумпано. Текстот Зошто сливите треба почесто да бидат на вашето мени е превземен од МАКФАКС.