Bureau of Fisheries and Aquatic Resources Region 7, nanguna sa SAFET 2026 sa Sugbo

Nanguna ang Bureau of Fisheries and Aquatic Resources Region 7 o BFAR 7 sa pagpahigayon sa Seafood and Fisheries Emerging Technologies o SAFET Conference 2026, nga gipahigayon sa Sugbo gikan September 8 hangtod 10. Gitambongan kini sa mga eksperto, policymakers, ug mga representante sa fisheries sector gikan sa dul-an 30 ka nasod. Gisentro sa conference ang tema nga 'From Innovation to Implementation: Technology Powering Responsible Fisheries, Markets, and Livelihoods.' Gihisgutan ang paggamit sa modernong teknolohiya alang sa mas maayong pagdumala sa pangisdaan, pakigbatok sa illegal fishing, ug pagpalambo sa panginabuhian sa mga komunidad nga nagsalig sa kadagatan. Matud ni DA-BFAR National Director Elizer Salilig, adunay dakong responsibilidad ug oportunidad ang Pilipinas sa paggamit sa teknolohiya alang sa responsable ug malungtarong pangisdaan. Samtang, gipasiugda ni BFAR 7 Regional Director Mario N. Ruinata ang panginahanglan sa igo nga pondo alang sa mga gagmay'ng mangingisda, ilabi na sa mga programa sa ahensya sa sunod tuig. Gilauman sa BFAR 7 nga ang dugang nga budget makatabang sa pagpalapad sa serbisyo ug suporta alang sa mga small-scale fishers ug coastal communities.