Петмина обвинители се кандидираа за наследник на Абази

Петмина обвинители поднесоа сопствени кандидатури за нов шеф на Основното јавно обвинителство за гонење организиран криминал и корупција (ОЈО ГОКК), информира претседателот на Советот на јавните обвинители, Башким Бесими. Вишиот јавен обвинител Јован Цветановски, поранешниот обвинител во СЈО, а сега обвинител во Вишото јавно обвинителство, Трајче Пеливанов, обвинителката од ОЈО Скопје, Лидија Раичевиќ, како и обвинителите од ОЈО ГОКК, Искра Хаџи-Василева и Фатон Азизи, се петтемина кандидати за наследник на Ислам Абази, чиј мандат истече. Советот на јавните обвинители в петок ќе одржи седница на која треба да бидат формирани комисии поврзани со постапката за избор на нов шеф на ОЈО ГОКК, а изборот ќе се спроведе на 28 октомври од 8 до 16 часот. Право да се кандидираат имаат јавни обвинители со најмалку шест години непрекинат стаж како јавен обвинител до моментот на пријавувањето и со позитивна оценка во последните три години.