"Marchan felices, sas e contentas": 306 crianzas saharauís despídense da Galiza despois dun verán de Vacacións en Paz

O aeroporto de Peinador, en Vigo, despediu esta segunda feira as 306 nenas e nenos saharauís que pasaron o verán na Galiza, acollidos por familias galegas. As Vacacións en Paz 2026 chegaron á súa fin despois de dous meses. Máis de trescentas crianzas regresaron aos campamentos de refuxiados de Tinduf, onde viven no exilio coas súas familias. O programa, promovido por Solidariedade Galega co Pobo Saharauí (Sogaps) e coordinado pola Asociación Galega de Axuda ao Pobo Saharauí en colaboración coa República Árabe Saharauí Democrática, desenvólvese desde hai 36 anos. O seu obxectivo é evitar que as crianzas saharauís dos campamentos de Tinduf estean expostas ás condicións climáticas extremas do verán, cando as temperaturas superan os 50 °C. Aliás, outras finalidades do programa son facilitar as revisións médicas das crianzas saharauís, garantirlles unha alimentación equilibrada e reforzar o coñecemento da lingua, que xa estudan nos seus centros educativos. Neste sentido, se é necesario, prolóngase a estadía das crianzas para que poidan recibir tratamento médico, segundo lembraron a este xornal desde a organización das Vacacións en Paz. Desde Sogaps sinalaron a Nós Diario que, a pesar da despedida, esta segunda feira foi "un día feliz" porque "as crianzas marchan felices, sas e contentas por se reuniren de novo coas súas familias e por poderen contarlles todas as experiencias que viviron no verán". Sogaps tamén quixo lembrar que en novembro fixéronse 50 anos da Marcha Verde, coa que Marrocos invadiu o Sáhara Occidental. Desde aquela, o pobo saharauí continúa vivindo en campamentos de refuxiados, a pesar de que "a ONU dixo que debería celebrarse un referendo de autodeterminación, un referendo que o pobo saharauí segue a agardar, que é a única solución xusta para o conflito e que aínda hoxe non se celebrou". "Estes nenos e nenas son embaixadores da súa causa e conseguen que non nos esquezamos dela aquí", reivindicaron desde Sogaps. Máis solidariedade Ao longo destes 36 anos de Vacacións en Paz, chegaron á Galiza perto de 8.000 nenas e nenos saharauís, acollidos por 7.000 familias galegas de 263 concellos. Estes datos son celebrados por Sogaps, mais a entidade quere aumentalos nos vindeiros veráns. Así, a asociación xa comezou a traballar a partir de hoxe nas Vacacións en Paz 2027.