Gjykata spanjolle nis hetim penal për hyrjen e mbi 70 mijë migrantëve në Ceuta -

Gjykata Kombëtare e Spanjës ka urdhëruar nisjen e një hetimi penal lidhur me hyrjen masive të migrantëve në enklavën spanjolle të Ceutës në fund të korrikut, ku mbi 70 mijë persona kaluan nga Maroku drejt territorit spanjoll. Gjykatësja hetuese María Tardón tha se ekzistojnë baza për të dyshuar se janë kryer veprime kriminale jashtë territorit të Spanjës, të cilat kanë cenuar rëndë integritetin territorial të vendit. Sipas vendimit, gjykata do të hetojë dyshimet për cenim të integritetit territorial, vrasje nga pakujdesia dhe organizatë kriminale, në përputhje me kriteret e Prokurorisë Publike, raporton Euronews, transmeton Sinjali. Tardón e cilësoi fluksin masiv të migrantëve si një nga format karakteristike të të ashtuquajturës 'luftë hibride' ose 'zonë gri', me synim ndikimin në jetën dhe të drejtat e qytetarëve spanjollë në Ceuta. Vendimi është mbështetur edhe në një raport të Policisë spanjolle, i cili përshkruan një 'lejueshmëri totale' nga ana e forcave të sigurisë marokene gjatë kalimit të migrantëve. Gjykatësja tha se nga sjellja e dokumentuar e forcave marokene është evidentuar një 'lehtësim i qartë dhe i padiskutueshëm i procesit'. Sipas saj, pjesëtarët e uniformuar të forcave marokene nuk kanë bërë përpjekje serioze për ta ndaluar fluksin, ndërsa disa prej tyre dyshohet se u kanë treguar migrantëve edhe mënyrën se si të kalonin kufirin. Qeveria spanjolle, megjithatë, ka deklaruar se nuk ka prova përfundimtare që Maroku ishte përgjegjës për hyrjen masive të migrantëve. Autoritetet marokene nuk kanë komentuar raportin e Policisë spanjolle, ndërsa mediat marokene e kanë cilësuar atë si një dokument të 'dështuar', duke pretenduar se nuk përmban prova të mjaftueshme. Shumica e migrantëve që hynë në Ceuta janë kthyer në Marok, por mijëra prej tyre kanë mbetur ende në enklavë, në një kohë kur tensionet politike mes Spanjës dhe Marokut janë rritur. Sinjali – aty ku e vërteta flet para lajmit! /GazetaSinjali/