Renfe "prioriza" unidades para Asturias e resta servizos na Mariña

"A xerencia de Renfe do servizo público de Asturias e Cantabria está a priorizar as unidades de gasóleo para a prestación de servizos en Asturias", denunciaron esta segunda feira desde a Plataforma pola Defensa do ferrocarril Ferrol-Ribadeo. A través dun comunicado, este colectivo lembrou que xa no pasado mes de agosto estiveron sen servizo de proximidade na Galiza os días 13, 17, 18, 19, 20 e 21. "O principal problema do noso Ferrol-Ribadeo e do resto do Ancho Métrico operado por Renfe (Asturias, Cantabria, Castela e León…) é o insuficiente parque de unidades (por culpa da súa fiabilidade), sobre todo de gasóleo, así como a falta de recambios para o mantemento das unidades", aseguran desde a plataforma. A "resposta" á situación por parte de Renfe, segundo indican desde este colectivo, foi "priorizar os servizos de Media Distancia entre Ribadeo e Asturias". Xerencia de Proximidade Esta situación, para a plataforma, está relacionada coa decisión de que os servizos de proximidade Ferrol-Ortigueira (único servizo deste tipo na Galiza) deixasen de formar parte da xerencia de Renfe de Servizo Público da Galiza, e pasasen a depender da xerencia de Renfe do Servizo Público Asturias e Cantabria. Diante deste panorama, o colectivo urxe "de inmediato" a creación dunha Xerencia de Proximidade da Galiza que reúna os servizos xa existentes Ferrol-Ortigueira e que teña "as necesarias unidades fixas asignadas". Lembran que "xa hai en funcionamento o servizo de proximidade e está xustificada a súa creación" polo que "de engadirse os percorridos de proximidade que están pendentes de estudio polo Goberno do Estado, poderían integrarse á xerencia xa creada".