Administrata Trump kundërshton planin britanik për t'u dhënë përparësi mediave tradicionale në platformat online

Administrata e presidentit amerikan Donald Trump ka shprehur 'shqetësime serioze' lidhur me nismën e qeverisë së Mbretërisë së Bashkuar për t'u kërkuar platformave online, përfshirë YouTube dhe rrjetet e tjera sociale, që të rrisin ekspozimin e mediave tradicionale si BBC dhe ITV. Në një paralajmërim të bërë nga Ambasada e SHBA-së në Londër thuhet se kjo politikë mund të hapë rrugën për 'censurë', duke u dhënë qeverive mundësinë të ndikojnë mbi burimet mediatike që algoritmet e platformave shfaqin më shpesh. Uashingtoni beson se propozimet britanike mund të krijojnë një precedent të shfrytëzueshëm nga regjimet autoritare për të arsyetuar kontroll më të madh mbi përmbajtjet në internet. Administrata amerikane ka ngritur shqetësime edhe për pasojat që një sistem i tillë mund të ketë te gazetarët dhe krijuesit e pavarur, sidomos te ata që nuk janë të lidhur me mediat tradicionale. 'Ruajtja e një interneti të lirë dhe të hapur dhe mbrojtja e lirisë së shprehjes në internet janë përparësi kryesore për administratën Trump' , thuhet në deklaratën e ambasadës amerikane. Sipas përfaqësisë diplomatike, çdo kuadër që u mundëson autoriteteve të përcaktojnë se cilat burime fitojnë më shumë dukshmëri mund të kthehet në një formë censure të motivuar nga pikëpamjet. Qeveria amerikane ka kërkuar që të jepen garanci se zbatimi i kësaj politike nuk do të ndikohet nga paragjykimet apo preferencat e zyrtarëve britanikë dhe organizatave të tjera, në mënyrë që të mos dëmtohet gazetaria e pavarur dhe zërat e pakicave. Ndërkohë, qeveria britanike e ka mbrojtur konsultimin e zhvilluar për të ardhmen e medias. Një zëdhënës i Departamentit për Kulturë, Media dhe Sport tha se Londra beson fuqimisht te liria e shprehjes dhe konkurrenca e ndershme. Plani i propozuar në Britani parashikon që platformat online të mund të detyrohen të ndërmarrin hapa për t'u dhënë përparësi materialeve që vlerësohen si të besueshme, në një periudhë kur përdoruesit po përdorin gjithnjë e më shumë YouTube, TikTok dhe X për t'u informuar. Përkrahësit e kësaj qasjeje thonë se ajo do të ndihmonte në përballjen me dezinformimin dhe në mbrojtjen e përmbajtjes kulturore britanike. Një tjetër synim i qeverisë është forcimi i transmetuesve të shërbimit publik, të cilët po përballen me vështirësi financiare si pasojë e zgjerimit të platformave dixhitale.