Cebu City-DRRMO, nagpalig-on sa contingency plans, nanawagan og pagdaginot sa tubig

Gipasiugda sa Cebu City Disaster Risk Reduction and Management Office o CCDRRMO ang panginahanglan sa sayo ug hiniusang pagpangandam tungod sa nagkaduol nga El Niño. Atol sa 'Strengthening Preparedness: A Unified Response to El Niño Summit 2026' sa Cebu Business Hotel, si Engr. Oscar Tabada sa CCDRRMO mipresentar og overview bahin sa El Niño ug sa posibleng epekto niini. Gipasabot ni Tabada nga ang El Niño mahimong magdala og dugay nga hulaw, ubos nga pag-ulan, ug mga hagit sa suplay sa tubig, agrikultura, ug panglawas sa publiko. Nanawagan siya sa mga opisina sa siyudad nga molihok sayo, magdaginot sa tubig, ug iandam ang ilang contingency plans sa dili pa mosamot ang epekto sa El Niño. Gitambongan sa mga nag-unang opisina sa City Hall ang maong summit, nga nagtumong sa paghiusa sa mga plano sa siyudad aron masiguro ang seguridad sa tubig ug kaluwasan sa katawhan sa umaabot nga mga bulan. Hiniusang aksyon ug sayong pagpangandam ang giila nga yawe aron mas maandam ang Cebu City sa posibleng epekto sa El Niño.