誓要母入土為安 申令阻火化 擬150萬風光大葬梅媽 梅啟明：啲錢會跌落嚟

已故天后梅艷芳母親「梅媽」覃美金早前離世，她生前已斷絕母子關係的長子梅啟明昨午見傳媒，表示將豪花150萬為梅媽風光大葬，又稱於殮房見對方「口郁郁」，誓言反對姪兒操辦後事「銷毀證據」。 梅媽辭世後，梅啟明一直動作多多，昨日更主動邀約傳媒見面，期間帶大家「遊花園」約40分鐘。自稱「孝子」的他欲撥150萬為母親辦後事，包括風水墓地、高僧誦經及棺木等費用，然而日前才透露從事園藝工作的他，如今已加入失業大軍。問到錢從何來，他竟豪氣說：「總之財來自有方，唔好質疑我，對於呢筆錢我一啲都唔擔心，一啲壓力都冇。（財來自有方係咩意思？）行到邊步，啲錢會跌落嚟！（邊度跌落嚟？）係秘密，總之依家牽涉司法程序。」 揚言捐阿梅遺產 梅媽日前「頭七」，梅啟明說：「我準備咗金銀衣紙，同佢鍾意食嘅嘢畀佢。佢離開翌日我去殮房睇佢，真係有啲Feel嘅，發覺佢口郁郁，好似講緊好凍咁，你哋（記者）可以唔信㗎！」當提到他想為梅媽風光大葬，疑違背了對方生前欲低調的意願，他即激動說：「錯！全錯！」更表態反對由姪兒梅柏麟操辦梅媽後事，打算向法院申請禁制令，禁止火化梅媽遺體：「阿媽個遺體梗係唔畀佢郁啦！畀佢燒咗毀滅晒啲嘢呀！同埋阿媽又怕火，佢老人家要入土為安，阿媽嘅心願就係咁。（你話想梅媽同阿梅一齊有個伴，阿梅當年火葬喎！）阿梅有個靈位喺大嶼山，九龍塘又有。個個都話我貪阿梅份身家，講句難聽啲，由阿梅走一刻後，我冇攞過佢一分一毫，阿媽畀一萬幾千嗰啲唔算係乜，如果收到阿梅遺產，全部捐晒出去！」 質疑遺囑造假 他又直斥姪兒梅柏麟別有用心：「如果一個人唔係有壞心思，點解唔同我商量，要咁急去（火化）？阿媽正式冇氣嗰陣喺間屋度，我質疑緊呢樣嘢，依家有冇遺囑都係一個問題。」並要求公開梅媽遺囑，其後又補充：「遺囑都可以造假，邊個見證、幾時立嘅先？」他愈說愈激動：「其實我喺美國返嚟後，佢（梅柏麟）已經當咗我係仇人，嗰日喺醫院望都冇望我，同佢兩個妹喺度笑。（你同佢冇溝通過？）點解我要搵佢？輩份都唔同，佢係孫嚟咋！」 提到梅媽生前已跟他斷絕關係，梅啟明反駁：「講呢啲冇意思，阿媽嗰時100歲，佢語無倫次，佢神志清唔清醒，你哋心中有數。（你哋好耐冇見，點知佢神志不清？）呢啲要畀鑑證科處理，要驗屍。（幾耐冇見阿媽？）兩、三年，喺街遇見照顧阿媽8年嘅貼身護士同我講，話阿媽要搵我，叫我快啲去搵阿媽，姪仔炒佢係因為佢知得太多喇！」至於打官司抗衡或令喪事遲遲未能完成，梅媽很難入土為安，梅啟明說：「佢唔安樂係佢一手一腳搞出嚟，如果佢真係唔安樂嘅話，我就係要佢入土為安！」