Katar: Synojmë uljen graduale të tensioneve në Lindjen e Mesme, Hormuzi mbetet prioritet

Katari po përqendron përpjekjet e tij në uljen graduale të tensioneve në Lindjen e Mesme, dhe jo në përfundimin e menjëhershëm të konfliktit, deklaroi zëdhënësi i Ministrisë së Jashtme të Katarit, Majed al-Ansari. Në një intervistë për CNN, al-Ansari tha se një nga prioritetet kryesore të Dohas është mbajtja e hapur e Ngushticës së Hormuzit, duke paralajmëruar për pasoja të rëndësishme ekonomike në rast të ndërprerjes së lundrimit në këtë zonë strategjike. Sipas tij, Katari synon të kufizojë gjithashtu presionin ekonomik mbi vendet e rajonit dhe të parandalojë një përshkallëzim të mëtejshëm ushtarak, përfshirë sulme të reja ndaj Iranit dhe në zonën e Gjirit Persik. Al-Ansari theksoi se konflikti në Lindjen e Mesme mund të zgjidhet vetëm përmes negociatave, duke bërë thirrje për përpjekje diplomatike për uljen e tensioneve. Ai paralajmëroi se çdo pengesë në lundrimin përmes Ngushticës së Hormuzit mund të sjellë rritje të inflacionit, pasiguri në furnizimin me energji dhe mungesa të produkteve ushqimore. Ngushtica e Hormuzit është një nga rrugët detare më të rëndësishme për transportin global të energjisë, veçanërisht për eksportet e naftës dhe gazit nga vendet e Gjirit Persik.