Hungaria dëbon 10 diplomatë rusë për aktivitete të papranueshme

Hungaria ka urdhëruar largimin nga vendi të 10 anëtarëve të misionit diplomatik rus në Budapest, për shkak të aktiviteteve që autoritetet hungareze i kanë cilësuar të papranueshme për diplomatët. Ministrja e Jashtme, Anita Orbán, tha se ambasadori rus është njoftuar se, sipas vlerësimit të autoriteteve hungareze, 10 anëtarë të misionit rus kanë zhvilluar aktivitete në kundërshtim me standardet e përcaktuara për diplomatët nga Konventa e Vjenës, raporton AP. Rusia ka bërë të ditur se do të reagojë ndaj dëbimeve. Autoritetet hungareze nuk kanë dhënë detaje mbi aktivitetet për të cilat akuzohen diplomatët dhe as afatin brenda të cilit ata duhet të largohen nga vendi. Dëbimi i diplomatëve shënon një ndryshim në qasjen e Hungarisë ndaj Moskës, pas 16 vitesh të qeverisjes së Viktor Orbánit, i cili kishte mbajtur marrëdhënie të afërta me presidentin rus Vladimir Putin dhe kishte kundërshtuar ose vonuar në disa raste sanksionet e Bashkimit Evropian ndaj Rusisë. Megjithatë, ministrja e Jashtme ka theksuar se Hungaria synon të ruajë kanalet diplomatike dhe kontaktet me Moskën.