Fraccion di MEP: Un parlamento cu no ta haci su trabou y un oposicion cu nunca a stop di purba

Awe e zittingsjaar 2025-2026 di Parlamento di Aruba a cera oficialmente. E cifranan oficial ta conta un historia cu pueblo di Aruba tambe a biba: un parlamento cu a faya'bo. Un parlamento cu su comisionnan no ta reuni no ta controla gastonan di gobierno. No ta proteha pueblo. No ta investiga y cuestiona decisionnan gubernamental. No ta haci su trabou. 62% di e reunionnan publico cu a keda pidi oficalmente no a wordo yama. 75% di e vragenuurnan, e herment mas basico cu un parlementario tin pa puntra gobierno, no a wordo yama. Di cada 10 pregunta por escrito haci na gobierno, 6 a keda sin contesta. Ta con un parlamento por controla y percura pa transparencia asina aki? Presidente di Parlamento tin e autoridad pa yama reunion. E tin e responsabilidad pa percura cu e organo constitucional cu e ta dirigi ta funciona. Na lugar di esey, el a scoge sistematicamente pa no yama reunion, pa laga e hermentnan di control parlamentario keda bashi. Esaki no ta un fayo tecnico. Esaki ta un escogencia politico consciente pa proteha un gobierno cu no kier wordo controla. Mientras esey tabata pasando, MEP no a para. MEP a haci miles di pregunta por escrito. MEP pidi reunion tras di reunion. MEP a manda carta tras di carta, tanto na ministernan, na e Presidente di Parlamento, como tambe na Gobernador. Nos a uza cada herment parlamentario disponibel pa obliga Gobierno brinda abo e transparencia cu bo merece. MEP a exigi accountability for di Gobierno. No pa pret, pero paso esaki ta e trabou di un parlamento den su totalidad. E resultado ta visibel. E comision bao liderazgo di colega Shailiny Tromp-Lee — esta comision di Financiën— tabata e mas activo di tur Staten den e aña completo cu 15 reunion total. Pasobra ora e mayoria ta scoge pa keda keto y no haci nan trabou, oposicion ta scoge pa sigui traha. Pero MEP no por haci e trabou di Parlamento su so. Un parlamento ta un organo colectivo. Si e Presidente ta blokia e funcionamento di e institucion, si e mayoria ta vota sistematicamente pa proteha gobierno enbes di control'e, e resultado ta un democracia cu ta faya su pueblo. Prijs cu pueblo ta paga Awe e pueblo ta sinti tur e consecuencianan. Decisionnan tuma sin consulta. Trahadornan sin proteccion. Ministernan cu ta ignora e ley. Un gobierno cu ta opera sin e control cu democracia ta exigi. E estado di derecho ta na peliger ora e institucionnan cu mester controla e poder ta scoge deliberadamente pa no funciona. Esaki ta loke e cifranan oficial di e zittingsjaar 2025-2026 ta confirma. MEP lo sigui cana tur caminda necesario, den parlamento, den corte, y si mester, na nivel di Reino. Pasobra pueblo di Aruba merece mas cu un parlamento plat.