O Porto do Son sumará máis de catro quilómetros de itinerario peonil e ciclista ao longo da AC-550

O proxecto, aprobado polo Consello da Xunta con declaración de utilidade pública, executarase en dous tramos entre Linteiros e Portosín, e de Freixedo a Campo de Prado. Imaxes de planta de actuacións previstas: A Xunta de Galicia deu luz verde definitiva ao proxecto de trazado para construír unha nova senda mixta para peóns e ciclistas ao longo da estrada autonómica AC-550 no termo municipal de Porto do Son. A actuación, cofinanciada con fondos europeos FEDER do período 2021-2027, contará cun orzamento próximo aos 2,65 millóns de euros e terá un prazo de execución estimado de 14 meses unha vez se adxudiquen as obras. O itinerario desenvolverase en dous tramos independentes paralelos á calzada: Treito Linteiros – A Gafa: Discorrerá pola marxe esquerda ao longo de algo máis dun quilómetro (entre os puntos quilométricos 78+320 e 79+400) para enlazar coas beirarrúas actuais que chegan ata Portosín. Discorrerá pola marxe esquerda ao longo de algo máis dun quilómetro (entre os puntos quilométricos 78+320 e 79+400) para enlazar coas beirarrúas actuais que chegan ata Portosín. Treito Freixedo – Campo de Prado: Situado na marxe dereita, abranguerá 3,2 quilómetros entre a saída de Freixedo e o tanatorio de Campo de Prado (do quilómetro 81+400 ao 84+600), aínda que se actuará sobre 2,3 quilómetros debido á presenza dun inmoble apegado á beiravía que impide o paso nese punto concreto. A senda contará cun ancho superior aos dous metros, estará sobreelevada catro centímetros respecto da beiravía e pavimentarase con formigón bicapa en ton terrizo, reforzado con mallazo nos accesos a parcelas e dotado de franxas podotáctiles nos cruces viarios e nas paradas de bus. O deseño incorpora tamén unha rede de drenaxe de pluviais, canalizacións soterradas para futuras redes de alumeado e telecomunicacións, e diversos muros de contención e cachotería ao longo do percorrido. Entre os elementos estruturais máis destacados da intervención atópase a construción de dúas pontes para salvar cauces fluviais: unha pasarela pilotada de nove metros de luz sobre o río Hornanda e outra estrutura de 15 metros sobre o río Quintáns. De xeito complementario, o proxecto permitirá acondicionar e facer accesibles seis paradas de transporte público —reubicando tres delas e renovando as marquesiñas conforme aos estándares autonómicos— para garantir unha mobilidade máis sostible e segura no municipio.