Bayan Central Visayas, nanawagan og mas taas nga minimum wage alang sa mga mamumuo

Gipasiugda sa Bayan Central Visayas ang panginahanglan sa pagtaas sa minimum wage sa mga mamumuo sa Central Visayas tungod sa nagkataas nga presyo sa mga palaliton ug panginahanglanon. Matud ni Jaime Paglinawan, Chairperson sa Bayan Central Visayas, padayon ang ilang pagduso alang sa wage increase atol sa mga public consultation sa Regional Tripartite Wages and Productivity Board. Giingon ni Paglinawan nga dili na igo ang kasamtangang minimum wage aron matubag ang inadlaw-adlaw nga panginahanglan sa usa ka mamumuo ug sa iyang pamilya. Gipunto niya nga dako ang economic output sa Central Visayas, apan wala kini makita sa kahimtang sa mga ordinaryong mamumuo nga nag-atubang gihapon sa taas nga presyo sa pagkaon, pamasahe ug uban pang panginahanglan. Matud ni Paglinawan, ang panawagan alang sa wage increase dili lamang para sa dugang kita sa mga mamumuo, kundili aron makab-ot ang sweldo nga igo alang sa usa ka desente ug makabuhi nga panginabuhi. Gilauman niini nga padayon nga mahatagan og konsiderasyon sa wage board ang posisyon sa mga mamumuo sa umaabot nga mga public hearing.