Охридскиот аеродром доби нов и современ лик, украсен со реплики од фрески и мозаици од Плаошник и Св. Софија

Со инвестиција од 2,7 милиони евра охридскиот аеродром доби нов и современ лик. Зградата на терминалот има зголем број шалтери, проширени се чек ин просторите, административната зграда, зоните за безбедносна контрола и рачен багаж, а вработените добија нов ресторан и паркинг. Во украсувањето употребени се реплики на мозаици и фрески од Плаошник и Света Софија, правејќи го аеродромот мал музеј, кој ги преставува убавините на Македонија. Со реконструкцијата, покрај подобрените услуги, премиерот очекува и зголем број патници. -Оваа година се бележат рекорди на охридскиот аеродром 'Св. Апостол Павле'. Имаме ден со најголем број патници досега во историјата — повеќе од 3.000. А исто така има и денови кога имаме повеќе од 20 полетувања, што исто така претставува само по себе еден значаен податок којшто е за почит. Убеден дека во периодот којшто претстои со сите градежни активности и поддршката којашто ја даваме како Влада, овие бројки ќе се дуплираат, ќе се триплираат и ќе дојдеме до бројки коишто претставуваат наш нов таргет, рече Христијан Мицкоски, премиер. Вицепремиерот Николоски задоволен од досегашните бројки. Најави зголемен број летови и патници, по изградбата на автопатот Кичево Охрид – некаде во првата половина од следната година. -Охридскиот аеродром само од јануари до јуни оваа година има над 240.000 патници, а двата аеродроми оваа година заедно ќе се приближат до 4 милиони, нешто што беше незамисливо за нашите аеродроми, и ќе продолжиме да растеме – рече Александар Николоски, вицепремиер и министер за транспорт. Од ТАВ, кој стапанисува со двата аеродроми, велат дека во изминатите 16 години инвестирале речиси 300 милиони евра. Затоа македонските аеродроми се меѓу најброзрастечките во Европа. -Во овој период, ја зголемивме поврзаноста и годишниот сообраќај за повеќе од четири пати. Во 2026 година, македонските аеродроми се меѓу најбрзорастечките аеродроми во Европа. Постигнавме раст од речиси 30 проценти во споредба со претходната година. Охридскиот аеродром го забележа најуспешниот јули во својата историја, поставувајќи нови рекорди и во бројот на патници и во бројот на реализирани летови – рече Серкан Каптан, извршен директор на ТАВ. Од Охридскиот аеродром оперираат 7 авиокомпании со 12 директни линии кон позначајните европски дестинации . Во летниот период има и три дополнителни чартер дестинации.