Deputetët e bllokuar në Kuvend, Policia tenton të lirojë aksin, turma zhvendoset tek Ministria e Brendshme

Vazhdon revolta e qytetarëve kundër deputetëve të Kuvendit, pas mbarimit të seancës. Protestuesit kanë gjuajtur me vezë, por edhe me shkelma e me mjete të tjera rrethanore makinën tip Benz të një deputeti. Automjeti qëndroi për pak kohë në një vend, ndërsa më pas u largua me shpejtësi. Protestuesit që ishin mbledhur pranë Kuvendit janë zhvendosur drejt Ministrisë së Brendshme, ku është përqendruar një numër i madh qytetarësh. Situata vijon të jetë e tensionuar, ndërsa protestuesit kanë vijuar me thirrjet kundër qeverisë dhe klasës politike. Ndërkohë, gjatë protestës janë shoqëruar disa persona nga policia. Mes tyre, sipas raportimeve nga vendngjarja, janë kreu i 'Shqipëria Bëhet', Adriatik Lapaj, dhe gazetari Shpend Gashi. Pas përfundimit të seancës plenare, disa deputetë kanë mbetur të bllokuar në ambientet e Kuvendit, pasi protestuesit kanë zënë rrugët përreth godinës. Forcat e policisë kanë tentuar të krijojnë një hapësirë për kalimin e automjeteve dhe lirimin e rrugës, ndërsa u kanë bërë thirrje protestuesve që të zhvendosen dhe të mos pengojnë qarkullimin. 'Lironi rrugën', kanë qenë thirrjet e policisë drejtuar protestuesve, ndërsa situata është shoqëruar me tensione. Ndërkohë një autobot me ujë qëndron në aksin e bllokuar, ndërsa policia është e pajisur dhe me gaz lotsjellës. Etiketa: Kryesore1 protesta