'Deformimi nisi nga vettingu'/ Ahmetaj akuzon Ramën për ndërhyrje politike

Ish-zëvendëskryeministri Arben Ahmetaj, i cili vijon të jetë në arrati, ka hedhur akuza ndaj mënyrës se si është zhvilluar procesi i vettingut në sistemin e drejtësisë. Në një intervistë për Syri TV, Ahmetaj pretendoi se vettingu nuk ka qenë një proces i pavarur, por është ndikuar politikisht nga drejtues të qeverisë. Sipas tij, në këtë proces kanë pasur rol të rëndësishëm tre persona, të cilët ai i lidhi me kryeministrin Edi Rama dhe figura të tjera pranë tij. Ahmetaj tha se një prej tyre ka qenë këshilltare e kryeministrit, e cila më pas është përfshirë në strukturat e vettingut. Në deklaratat e tij ai përmendi gjithashtu motrën e ministres Belinda Balluku, si dhe vajzën e një personi që e cilësoi si mik të hershëm të Edi Ramës. Ish-zëvendëskryeministri deklaroi se nuk e kishte menduar se deformimi i sistemit do të niste pikërisht nga procesi i vettingut, duke e konsideruar ndikimin politik si një problem që, sipas tij, ka prekur reformën në drejtësi. 'Vettingu është bërë nën kujdestari politike', pretendoi Ahmetaj, duke përsëritur akuzat e tij për ndërhyrje në proces. Etiketa: arben ahmetajbelinda ballukuEdi Ramavetting