Tension rreth parlamentit, policia merr zvarrë protestuesit

Situata vijon të jetë e tensionuar në qendër të Tiranës, ku protestuesit janë zhvendosur pranë ambienteve të Kuvendit dhe Ministrisë së Brendshme, duke bllokuar disa prej akseve rrugore përreth. Pas përfundimit të seancës plenare, një pjesë e deputetëve kanë mbetur brenda godinës së Kuvendit, pasi protestuesit kanë zënë rrugët dhe kanë penguar lëvizjen e automjeteve. Përballë kësaj situate, forcat e policisë kanë tentuar të krijojnë një korridor për qarkullimin dhe daljen e automjeteve nga zona. Efektivët u kanë kërkuar protestuesve të zhvendosen dhe të lirojnë rrugën, ndërsa situata është shoqëruar me tensione. 'Lironi rrugën', u kanë bërë thirrje vazhdimisht efektivët protestuesve. Në zonën e bllokuar ndodhet edhe një autobot me ujë, ndërsa forcat e policisë janë të pajisura me mjete kundër protestave, përfshirë gaz lotsjellës. Tensionet vijojnë në qendër të kryeqytetit, ndërsa protestuesit mbeten të grumbulluar pranë institucioneve.