Македонците од дијаспората со завет за зачувување на јазикот, културата и идентитетот

По повод 35-годишнината од независноста, Македонците во татковината и дијаспората го одбележуваат 8 Септември со пораки за единство, припадност и зачувување на македонскиот јазик, култура, традиција и национален идентитет. Од Малме и Скопје, до Њујорк и македонските средини во Албанија, заедничката порака е дека границите не можат да ја прекинат врската со татковината и со македонското национално наследство. Обединетата Македонска Дијаспора со серија настани симболично ги поврзува Македонците од различни делови на светот. Прославите започнаа во Малме, продолжуваат во Скопје, а ќе завршат со свечено подигнување на македонското знаме во Њујорк на 26 септември. Пораката што ја испраќа ОМД е дека, и покрај илјадниците километри што ги делат Македонците, заеднички ги поврзуваат едно знаме, една историја и една татковина. 'Од Европа, преку Македонија, до САД, илјадници километри нè делат, но едно знаме, една историја и една татковина нè обединуваат. 35 години независна Македонија. 35 години гордост, истрајност и надеж. Каде и да сме, Македонија е со нас', порачаа од ОМД. Одбележувањето на независноста стигна и од Македонците во Албанија. Македонската партија, Македонската алијанса за европска интеграција и македонските друштва порачаа дека Македонија е нивниот завет и потсетија на придонесот на Македонците од Албанија во историскиот процес на создавање и зачувување на македонската државност. 'Со негувањето на македонскиот јазик, култура, традиција и националниот идентитет, Македонците од Албанија со гордост се дел од македонската историја и одбележувањето на овој голем празник. Нека е вечен споменот на сите оние кои придонесоа за слободна и независна Македонија. Да го чуваме, почитуваме и славиме овој голем ден со гордост, достоинство и љубов. Нека е честит 8 Септември – Денот на независноста на Македонија', пишува во честитката на друштвото. Поранешниот градоначалник на Пустец и активист Едмонд Темелко денеска од Штип порача дека македонскиот јазик, култура и традиција опстанале во Пустец и во другите македонски средини во Албанија, пренесувајќи се од генерација на генерација. 'Од 61 општина што беа до моментот, од мнозинството, од социјалистичката владејачка партија има предлог што е во собраниска процедура, каде ќе има 46 општини. Петнаесет општини се скратуваат во Република Албанија, но тоа што е најважно и најбитно за нас Македонците, општина Пустец останува во предлогот и на владејачката партија и на опозицијата. Значи, Општина Пустец не се ризикува да остане како што беше македонска општина во Албанија', вели Темелко. Тој додаде дека не е прифатено барањето на Македонците во Албанија да имаат посебни општини во Голо Брдо, Булчица и во областите Гора и Кукаш. 'Добро што општина Пустец останува како македонска посебна општина и ние ќе продолжиме и понатаму да бараме признавање на сите Македонци во целата територија на Албанија – и во областа Голо Брдо и во Гора, за да можат да ги имаат истите права што ги имаат Македонците во Пустец, да имаат и Македонците во Голо Брдо и во Гора', рече Темелко. Прашан дали во Албанија се почитуваат македонскиот јазик, култура и традиција, Темелко одговори дека во Пустец и насекаде во Албанија, македонскиот јазик, култура и традиција се опстанати, бидејќи се пренесува од дедовци на внуци, од мајки на синови. 'Се пренесува културата и традицијата. Во Пустец е поизразена и повеќе зачувана заради тоа што секогаш во Општина Пустец Македонците се признаени од властите во Република Албанија. Сите знаат, освен да зборуваат, и да пишуваат на кириличко писмо. За разлика од тоа, Македонците што живеат во другите места – во градовите Корча, Билишта, Подградец, во Елбасан, а во областа Голо Брдо каде се мнозинство Македонци, во Гора – таму јазикот и традициите се чуваат само пренесени од нивните предци, без да имаат право да учат во школите на својот мајчин јазик', изјави Темелко. Тој истакна и дека Албанија има донесено закон на сите малцинства да им се почитуваат правата. 'Се надеваме во иднина и таму да почне да се учи кирилското писмо и македонскиот јазик во училиштата каде што има значителен број на деца Македонци', подвлече Темелко од Штип.