SEC Cebu, nakadawat og 144 ka reklamo sa scam; publiko gipahimangnoan batok sa online fraud

Nakadawat ang Securities and Exchange Commission (SEC) Cebu Extension Office og 144 ka reklamo nga may kalabutan sa scam gikan Enero hangtod Agosto ning tuiga. Lakip sa mga gitaho nga kaso ang mga loan scam, diin usa ka transaksyon mikabat og ₱800,000. Si SEC Cebu Extension Office OIC Atty. Jesher Radaza mipahimangno nga nagpadayon sa pag-usab ug pagpalambo sa ilang mga taktika ang mga scammer. Gikan sa naandan nga face-to-face nga transaksyon, misulod na sila sa online platforms ug social media, lakip ang mga scam nga may kalabutan sa cryptocurrency. Samtang, nagpasidaan usab ang Bangko Sentral ng Pilipinas (BSP) sa publiko batok sa pag-klik sa mga kadudahang link, ilabina sa mga mensahe nga nagaingon nga na-hack ang ilang bank account ug nangayo og personal nga impormasyon. Gipahimangnoan ang publiko nga dili basta-basta motuo o mohatag og personal ug banking information sa mga wala mailhing tawo o online accounts aron malikayan ang pagkabiktima sa scam.