Protesta para Kuvendit/ Deputetët mbeten të bllokuar, policia u kërkon protestuesve të lirojnë rrugën

Situata vijon të jetë e tensionuar në qendër të Tiranës, ku protestuesit janë përqendruar pranë ambienteve të Kuvendit dhe Ministrisë së Brendshme. Pas përfundimit të seancës plenare, disa deputetë kanë mbetur të bllokuar në ambientet e Kuvendit, pasi protestuesit kanë zënë rrugët përreth godinës. Forcat e Policisë kanë tentuar të krijojnë një hapësirë për kalimin e automjeteve dhe lirimin e aksit, ndërsa u kanë bërë thirrje protestuesve të zhvendosen dhe të mos pengojnë qarkullimin. 'Lironi rrugën' , kanë qenë thirrjet e policisë drejtuar protestuesve, ndërsa situata vijon të shoqërohet me tensione.