Në moshën 95-vjeçare, Bernie Ecclestone arrestohet në Portugali për a*më të padeklaruar

Ish-shefi i Formula 1, Bernie Ecclestone, është arrestuar në Portugali në moshën 95-vjeçare, pasi në bagazhin e tij është gjetur një armë zjarri e padeklaruar. Sipas mediave lokale, Ecclestone u ndalua pas mbërritjes në Aeroportin e Tires, në Cascais, ku kishte udhëtuar me avionin e tij privat nga Saaneni i Zvicrës. Gjatë kontrollit rutinë të bagazheve, policia portugeze zbuloi një pushkë që nuk ishte e regjistruar apo deklaruar. Arma u sekuestrua, ndërsa Ecclestone u arrestua nën dyshimin për mbajtje të paligjshme të armës. Avioni i tij kishte mbërritur në terminal rreth orës 10:55 të së hënës. Pas uljes, oficerët e Divizionit të Aeroportit të Policisë së Sigurisë Publike kryen kontrollet, gjatë të cilave u zbulua arma. Deri tani, autoritetet portugeze nuk kanë dhënë një deklaratë zyrtare lidhur me rastin. Nuk është hera e parë që përballet me një situatë të tillëKy nuk është incidenti i parë i këtij lloji për Ecclestone. Në maj të vitit 2022, ai ishte arrestuar në aeroportin e Campinas në Brazil, pasi në bagazhin e tij ishte gjetur një pistoletë LW Seecamp 32 pa dokumentacionin përkatës. Në atë rast, Ecclestone deklaroi se nuk ishte në dijeni që arma ndodhej në bagazhin e tij. Ai u lirua pasi pagoi një garanci prej 6 mijë reaish braziliane, rreth 1,150 euro, ndërsa arma u konfiskua. Më vonë, britaniku e kishte cilësuar ngjarjen si një 'incident qesharak dhe të parëndësishëm'. Ecclestone kishte treguar gjithashtu se pistoletën e kishte blerë vite më parë nga një mekanik në një pistë të Formula 1, duke thënë se e kishte mbajtur si masë parandaluese. Katër vjet pas incidentit në Brazil, 95-vjeçari është përballur sërish me autoritetet për një rast të ngjashëm, këtë herë në Portugali. Bernie Ecclestone ishte për dekada një nga figurat më të fuqishme të Formula 1 dhe luajti rol kyç në shndërrimin e kampionatit në një prej produkteve më të mëdha sportive dhe komerciale në botë./Telegrafi/