गुल्मीमा रातिमा अत्यावश्यक बाहेकका सवारीसाधन सञ्चालनमा रोक

गुल्मीमा भारी वर्षाको सम्भावनाका कारण असोज ९ देखि १२ गतेसम्म राति ७ बजेदेखि बिहान ५ बजेसम्म अत्यावश्यकबाहेक सवारीसाधन सञ्चालनमा रोक लगाइएको छ। बाढी, पहिरो र मानवीय क्षतिको जोखिमका कारण प्रशासनले अत्यावश्यक कामबाहेक घरबाहिर ननिस्कन जिल्लावासीलाई अनुरोध गरेको छ। गुल्मी । मौसममा आएको परिवर्तनसँगै वर्षा भइरहेको र आगामी केही दिनसम्म मेघगर्जन, चट्याङ तथा हावाहुरीसहित भारी वर्षा हुने सम्भावना रहेकाले गुल्मीमा रातिको समयमा अत्यावश्यकबाहेकका सवारीसाधन सञ्चालनमा रोक लगाइएको छ । जिल्ला सुरक्षा समितिको निर्णयअनुसार आज असोज ९ गतेदेखि असोज १२ गतेसम्म बेलुका ७ बजेदेखि बिहान ५ बजेसम्म अत्यावश्यक कामबाहेकका सवारीसाधन सञ्चालनमा रोक लगाइएको हो । भारी वर्षाका कारण बाढी तथा पहिरोले सडकखण्ड अवरुद्ध हुन सक्ने र मानवीय क्षति हुन सक्ने जोखिमलाई मध्यनजर गर्दै यात्रु तथा सवारीसाधनको सुरक्षा सुनिश्चित गर्न यस्तो निर्णय गरिएको जिल्ला प्रशासन कार्यालय गुल्मीले जनाएको छ । साथै, अत्यावश्यक कामबाहेक घरबाहिर ननिस्कन प्रशासनले जिल्लावासीलाई अनुरोध गरेको छ ।