Petrolyo, tataas ng hanggang P5/L ngayong Martes

MANILA, Philippines — Magpapatupad na naman ng malakihang pagtaas sa presyo ng mga produktong petrolyo ang mga kumpanya ng langis sa bansa ngayong linggong ito bunsod pa rin nang nagpapatuloy na kaguluhan sa Gitnang Silangan. Ito ang inanunsiyo ng Department of Energy (DOE) na ang presyo ng diesel ay inaasahang tataas ng hanggang P5.18 kada litro; ang gasolina ay magkakaroon din nang pagtaas sa presyo na hanggang P4.69 kada litro at pinakamalaki naman ang pagtaas sa presyo ng kerosina na aabot sa P5.58 kada litro. Ang pinal na paggalaw ng mga presyo ng mga produktong petrolyo ay karaniwan nang iniaanunsiyo ng DOE at mga kumpanya ng langis tuwing araw ng Lunes at ipinaiiral naman kinabukasan.