Irani pretendon se kapi një nëndetëse amerikane pa ekuipazh në Ngushticën e Hormuzit

Irani pretendon se forcat detare të Gardës Revolucionare Islamike kanë kapur një nëndetëse amerikane pa ekuipazh në hyrje të Ngushticës së Hormuzit. Sipas agjencisë shtetërore IRNA, mjeti u kap gjatë një 'operacioni të drejtuar nga inteligjenca'. Teherani ka njoftuar gjithashtu se fotografitë e mjetit do të publikohen së shpejti. Pretendimi vjen në një moment tensioni të lartë mes Iranit dhe SHBA-së, ndërsa trafiku detar në Hormuz është reduktuar ndjeshëm. Deri tani, nuk ka një konfirmim zyrtar nga pala amerikane për kapjen e mjetit. Më herët, SHBA-ja kishte mohuar një pretendim të ngjashëm iranian për goditjen e një mjeti amerikan pa ekuipazh në këtë zonë. Nëse konfirmohet, incidenti do të përbënte një zhvillim të rëndësishëm në përplasjen ushtarake mes dy vendeve, për shkak të rëndësisë strategjike të Ngushticës së Hormuzit.