'ИЗЛЕЗЕТЕ НА ГЛАСАЊЕ': Весниците со повици до граѓаните пред историскиот референдум во 1991 година

Деновите пред 8 Септември 1991 година биле исполнети со јавни повици граѓаните масовно да излезат и да се изјаснат на референдумот за независност. Како изгледала тогашната кампања денес може да се види преку зачуваните примероци од весниците во Градската библиотека 'Браќа Миладиновци'. На страниците на тогашните весници биле објавувани прогласи, повици до граѓаните и самото референдумско прашање. Паралелно со медиумската кампања, низ општините во државата биле организирани трибини и собири на кои граѓаните се информирале за значењето на претстојното изјаснување. Зачуваните весници откриваат и интересен детаљ за изгледот на тогашниот печат. Нивниот формат бил значително поголем од оној на денешните весници, што ја прави разликата меѓу тогашните и современите изданија веднаш забележлива. Од денешна перспектива, старите веснички страници сведочат за интензивните подготовки во пресрет на 8 Септември. Историскиот ден не бил неочекуван настан, туку неговото доаѓање било најавувано и промовирано со денови и недели однапред – преку јавни собири, на улиците и на страниците на весниците.