BNG pídelle ao Goberno blindar a liberdade de opinión ante a "persecución xudicial" ao denunciar a situación de Palestina

O deputado do BNG no Congreso, Néstor Rego, reclama ao Goberno que adopte todas as medidas necesarias para protexer o dereito á liberdade de expresión, de opinión e de publicación perante a nova causa aberta contra o escritor galego Suso de Toro polas súas denuncias do xenocidio cometido en Palestina. Segundo a información difundida pola organización ACOM (Acción e Comunicación sobre Oriente Medioambiente), a Audiencia Provincial de Madrid deixaría sen efecto o sobresemento provisional da causa iniciada hai dous anos a raíz dunha denuncia contra o escritor, por un presunto delito de incitación ao odio antisemita. Néstor Rego advirte de que esta situación implica "un novo intento de criminalizar as posicións de solidariedade co pobo palestino e as críticas ás políticas de Israel", e considera "especialmente grave" que o propio Suso de Toro coñecese a reapertura do procedemento a través dos medios de comunicación, sen ter recibido, "polo momento", comunicación oficial do órgano xudicial. "Non se pode confundir antisionismo con antisemitismo nin converter a denuncia do xenocidio que está a sufrir o pobo palestino nun delito de odio. Defender os dereitos do pobo palestino, denunciar as actuacións do Estado de Israel ou poñer en cuestión unha ideoloxía política como o sionismo forma parte do exercicio da liberdade de expresión", sinala o deputado nacionalista. Considera que o caso de Suso de Toro non é un feito illado, senón que se insire "nun contexto de crecente persecución de persoas e colectivos que expresan publicamente a súa solidariedade con Palestina e denuncian as actuacións de Israel". Neste sentido, reclama ao Goberno "garantir que ningunha persoa sexa perseguida por exercer de maneira pacífica e democrática os seus dereitos fundamentais". "É especialmente preocupante que se pretenda empregar o delito de odio para perseguir opinións políticas e expresións de solidariedade co pobo palestino. O Goberno debe actuar para garantir a liberdade de expresión e impedir calquera utilización abusiva dos mecanismos do Estado contra quen denuncia o xenocidio", defendeu Rego.